Автор: koryu

За време на настанот, учесниците беа поделени во две групи односно во првата се вежбаа техниките од програмата за полагање 6-ти кју, додека во втората беа напредните ученици кои ги вежбаа катите од првиот каталог (Иккаџо) од 118-те тајни техники (Хиден Мокуроку) на вештината. Додека почетниците успешно ги повторуваа основите на движењето на телото, како и начините на удирање, напредните вежбачи го втемелуваа знаењето стекнато во претходните години. Нивниот напредок беше видлив на секое поле. 

Оваа година беше доста успешна за Даито рју Македонија – Корју Доџо. Иако бројот на членовите кои ја вежбаат оваа самурајска боречка вештина се уште е мал, сепак нивната посветеност е на доста големо ниво. 

Во текот на 2015 година, се одржаа вкупно седум семинари на кои инструкторот Довезенски го пренесуваше своето знаење од школата. Во април, го организиравме традиционалниот годишен семинар со учителот Антонино Черта, при што шиханот не подучуваше на некои нови техники од вештината. За време на настанот, учителот Черта му додели втор дан (Нидан) на инструкторот Довезенски, додека на нашиот член Марко Опачиќ му беше доделена титула фукушидоин, при што беше промовиран во прв дан (Шодан). 

Во месецот јуни, се одржа традиционалниот Оно ха Итто рју (Такеда-ден) семинар, насловен како „Кенџутсу под Ѕвездите на Липац“, што секогаш се одржува во чест на нашиот учител Черта, а една недела претходно Довезенски учествуваше на меѓународниот семинар во Градара (Италија) под водство на наследникот на Оно ха Итто рју Кенџутсу – Соке Сасамори Такеми. За тие што не знаат, оваа самурајска мечувалска школа во минатото била задолжителна за сите самураи од кланот Такеда, а благодарение на неа, полесно можат да се разберат принципите на вештината Даито рју Аикиџуџутсу. 

Следниот семинар со инструкторот Довезенски веќе е закажан за јануари, додека Сенсеи Черта повторно ќе ни предава во Македонија во април (2016-та).   

Инструкторот Игор Довезенски предаваше техники од првиот каталог на првото ниво (иккаџо), но овој пат на малку поинаков начин. Имено, секоја од катите беше најпрвин предадена и вежбана во нејзината оригинална форма, за потоа истата се изведуваше со различен напад од страна на противникот. Овој начин придонесе учесниците да согледат една поинаква перспектива на вештината, а истовремено подлабоко да ја разберат суштината на самата техника. 

На крајот, беше договорено да се одржат уште неколку вакви неделни мини-семинари до крајот на годинава. 

Тренингот како и секогаш се одвиваше со многу засилена динамика, без нималку штедење ниту во физичка ниту во ментална смисла, што беше показател дека материјалот од нивото Иккаџо се подобро се совладува.

Во текот на вториот ден, интензивно се вежбаа катите од второто ниво (Никкаџо), а големо изненадување беше брзиот напредок на нашиот член Дарко Неделковски, кој со своето залагање брзо ги освои симпатиите на постарите ученици.

Во слободното време, инструкторот Довезенски на учениците им раскажуваше некои случки од тренингот со Сенсеи Антонино Черта во Италија, како и за некои настани кои се поврзани со овој голем човек и учител. 

По завршувањето на семинарот, на интерниот Форум на „Пат кон Сонцето“, инструкторот Довезенски го напиша следното:

„И кога ми беше најтешко и кога немав никакви услови за тренинг на Даито рју Аикиџуџутсу. И кога немав финансии и подршка од никого – НЕ СЕ ОТКАЖАВ! Не само затоа што јас НИКОГАШ не се откажувам, туку и поради еден прекрасен човек со име Антонино Черта. Мојот Учител за Даито рју Аикиџуџутсу. 

И успеав. Го создадов Корју Доџо-то. Го издигнав од пепел. Се оформи стабилна и сериозна група на ученици, која иако мала, до уши е вљубена во оваа стара и благородна боречка вештина. 

И не само тоа. Поради љубовта и почитта кон Сенсеи Черта и поради грижата на совест дека не правам доволно за НЕГО, ја внесов вештината Даито рју во редовната програма на Универзитетот „Свети Кирил и Методиј“. Вчера разбрав дека студенти од други факултети сакаат да го изберат предметот во кој се одржуваат вежби за Даито рју.

И да знаеш Сенсеи Черта, не застанувам тука. Ниту јас, ниту моите (твоите) ученици од Македонија. Ќе ја вежбаме „твојата“ вештина и ќе ја пренесуваме традицијата на твојот учител Токимуне Такеда додека сме живи!“